काठमाडौं- अन्तर्राष्ट्रिय पत्रकार महासङ्घ (आईएफजे) ले पाकिस्तानको प्रेस स्वतन्त्रतासम्बन्धी नयाँ प्रतिवेदन सार्वजनिक गरेको छ । सन् २०२५-२६ को यो प्रतिवेदनले पाकिस्तानमा पत्रकारिता क्षेत्र गम्भीर सङ्कटमा परेको देखाएको छ । त्यहाँ मिडियामाथि सरकारी दमन र आर्थिक चुनौती निकै बढेको छ ।

प्रतिवेदनका अनुसार पाकिस्तान सरकारले कडा कानुनमार्फत सञ्चार माध्यममाथि निगरानी बढाएको छ । ‘भ्रामक समाचार’ नियन्त्रण गर्ने बहानामा पत्रकारहरूलाई निसाना बनाइएको छ । केही पत्रकारहरूलाई आतंकवाद अदालतले जन्मकैदको सजायसमेत सुनाएको छ । नयाँ साइबर अपराध अनुसन्धान निकायले पत्रकारका कार्यालयमा छापा मार्ने र डिजिटल प्लेटफर्महरू बन्द गर्ने काम गरिरहेको छ ।

गत एक वर्षमा पाकिस्तानमा पत्रकारहरूमाथि आक्रमण र हिंसाका घटना धेरै भएका छन् । यस अवधिमा कम्तीमा तीन जना पत्रकारको हत्या भएको छ। पत्रकार संगठनका कार्यालयमा छापा मारिएका छन् । राजनीतिक दलका कार्यकर्ताहरूले पनि पत्रकारमाथि कुटपिट गरेका छन् । केही पत्रकारको घरमा गोली प्रहार समेत भएको छ ।

सरकारले आफ्नो आलोचना रोक्न मिडियालाई दिइने विज्ञापन रोक्ने गरेको छ। ‘डन मिडिया ग्रुप’ लाई दिइने विज्ञापन पूर्ण रूपमा बन्द गरिएको छ । यसले गर्दा मिडिया उद्योगमा आर्थिक सङ्कट चुलिएको छ । पत्रकारहरूले समयमै तलब पाएका छैनन्। धेरै सञ्चारमाध्यमबाट कर्मचारी कटौती गरिएको छ। यसले पत्रकारिताको स्वतन्त्रतालाई कमजोर बनाएको प्रतिवेदनमा जनाइएको छ ।