काठमाडौं- बेलायती संसदीय समूहले पाकिस्तानमा मारिया शाहबाज नामकी इसाई बालिकाको अपहरण र जबरजस्ती विवाहको घटनाप्रति गम्भीर चिन्ता व्यक्त गरेको छ । पाकिस्तानको संघीय संवैधानिक अदालतले सो विवाहलाई वैधानिक ठहर गरे पनि बालिकाका पिताले भने उनी नाबालिक रहेको र उनलाई दबाबमा पारेर धर्म परिवर्तन गराइएको दाबी गर्दै आएका छन् ।

पाकिस्तानी अल्पसंख्यकका लागि सर्वदलीय संसदीय समूहले एक विज्ञप्ति जारी गर्दै पाकिस्तानको न्याय प्रणालीको सम्मान गरे पनि अल्पसंख्यक समुदायका बालिकाहरूको सुरक्षामा प्रश्न उठाएको छ । दशकौँदेखि इसाई र हिन्दु अल्पसंख्यक बालिकाहरूलाई मुस्लिम पुरुषहरूले लक्षित गरी अपहरण, बलात्कार र जबरजस्ती धर्म परिवर्तन गराउने गतिविधि देखिएको समूहको ठहर छ।

यस्ता घटनामा अदालतहरू अक्सर अपहरणकारीकै पक्षमा उभिने गरेकाले पीडितले न्याय पाउन ठुलो कानुनी र सामाजिक अवरोध झेल्नुपर्ने अवस्था छ। संसदीय समूहका सह-अध्यक्ष लर्ड एल्टनले बालबालिकाको सुरक्षा र अल्पसंख्यकको संरक्षण आधारभूत सिद्धान्त भएको बताए ।

विशेषगरी नाबालिक जोडिएका घटनामा उच्च तहको छानबिन र पारदर्शिता आवश्यक हुने उनको भनाइ छ। समूहले पाकिस्तानी अधिकारीहरूलाई यस्ता सबै आरोपहरूको उचित अनुसन्धान गर्न र कानुन कडाइका साथ कार्यान्वयन गर्न आग्रह गरेको छ।

यसैबीच, समूहले सुकुम्बासी बस्तीमा बस्ने क्रिस्चियन समुदायको उठिबासको विषयलाई पनि उठाएको छ। गरिबी र आवास बजारमा हुने विभेदका कारण उनीहरूका लागि बस्ने अन्य कुनै विकल्प नरहेको भन्दै समूहले चिन्ता व्यक्त गरेको छ। अल्पसंख्यकहरूको सुरक्षाका लागि अन्तर्राष्ट्रिय सहयोगलाई थप बलियो बनाउन समेत माग गरिएको छ।