काठमाडौं– कोशी प्रदेशमा आर्थिक वर्ष ०८२/८३ अन्तर्गत सञ्चालित स्वास्थ्य कार्यक्रमहरूको अर्धवार्षिक समीक्षा सुरु गरिएको छ । 

स्वास्थ्य निर्देशनालय धनकुटाद्वारा विराटनगरमा आयोजित प्रदेशस्तरीय समीक्षा गोष्ठीमा १४ जिल्लाका स्वास्थ्य कार्यालय, अस्पताल तथा आयुर्वेद केन्द्रहरूले गरेका काम, उपलब्धि र चुनौतीबारे विस्तृत छलफल हुने जनाइएको छ । 

कार्यक्रमलाई सम्बोधन गर्दै कोशी प्रदेशका स्वास्थ्य मन्त्री मानबहादुर लिम्बुले हरेक योजनालाई परिणाममुखी बनाउन निर्देशन दिए । 

उनले जनतालाई सुलभ र गुणस्तरीय स्वास्थ्य सेवा उपलब्ध गराउन सबै अस्पताललाई डिजिटल तथ्यांक प्रणालीमा आबद्ध हुन आग्रह समेत गरे । 

त्यस्तै कोशी प्रदेश स्वास्थ्य निर्देशनालयका निर्देशक ज्ञानबहादुर बस्नेतले प्रदेशमा सञ्चालित स्वास्थ्य कार्यक्रमहरूको प्रगति अपेक्षाकृत सुस्त देखिएको उल्लेख गर्दै यसको प्रभावकारिता बढाउन आवश्यक रहेको धारणा राखे ।

कार्यक्रममा विगत आठ महिनामा स्वास्थ्य मन्त्रालयले जम्मा ३१ प्रतिशत मात्र बजेट खर्च गर्न सकेको तथ्यसमेत सार्वजनिक गरिएको थियो । 

तीन दिनसम्म सञ्चालन हुने अर्धवार्षिक समीक्षा गोष्ठीमा स्वास्थ्य कार्यालय, अस्पताल तथा आयुर्वेद केन्द्रहरूको कार्यसम्पादन र प्रगतिको समग्र समीक्षा गरिने बताइएको छ ।