गाजा – इजरायली सेनाको ड्रोन आक्रमणमा अल जजिरा मुबासेरका संवाददाता मोहम्मद विसाहको मृत्यु भएको छ । गाजा सहरको पश्चिमी क्षेत्रमा बुधबार भएको उक्त आक्रमणमा उनको ज्यान गएको हो ।

सन् २०२३ अक्टोबरमा गाजा क्षेत्रमा इजरायली सैन्य कारबाही सुरु भएयता अल जजिरामा कार्यरत पत्रकारमध्ये मारिने विसाह १२ औँ पत्रकार हुन् ।

विभिन्न अन्तर्राष्ट्रिय सञ्चार माध्यमका अनुसार गाजामा इजरायली युद्ध सुरु भएयता कम्तीमा २६२ पत्रकारले ज्यान गुमाइसकेका छन् । सन् २०२५ अक्टोबरमा भएको भनिएको ‘युद्धविराम’ सम्झौतापछि मात्रै इजरायली आक्रमणमा परेर युद्धग्रस्त गाजा क्षेत्रमा ७०० भन्दा बढी प्यालेस्टिनीको मृत्यु भइसकेको छ ।

पछिल्लो समय पत्रकारलाई लक्षित गरी भएका यी आक्रमणको विश्वव्यापी रूपमा आलोचना भइरहेको छ ।