काठमाडौं– नेपालमा सुर्तीजन्य पदार्थ सेवन गर्नेको संख्या चिन्ताजनक रहेको पाइएको छ ।  

राष्ट्रिय तथ्यांक कार्यालयले सार्वजनिक गरेको नेपाल बहुसूचक सर्वेक्षण २०८१-८२ अनुसार सर्वेक्षण अनुसार १५ देखि ४९ वर्ष उमेर समूहका ५.१ प्रतिशत महिलाहरू र ४१.८ प्रतिशत पुरुषहरूले सर्वेक्षणभन्दा अघिल्लो महिनामा कुनै न कुनै किसिमको सुर्तीजन्य पदार्थ सेवन गरेको देखिएको छ।

तथ्यांक अनुसार ७.६ प्रतिशत पुरुष र २.१ प्रतिशत महिलाले १५ वर्ष उमेर नपुग्दै नै चुरोट वा सुर्तीजन्य पदार्थ सेवन सुरु गरेको पाइएको छ। यसले किशोर अवस्थामा नै लत बस्ने प्रवृत्ति बढ्दै गएको संकेत गर्छ ।

स्वास्थ्य विज्ञहरूका अनुसार कम उमेरमै सुर्तीजन्य पदार्थ सेवन सुरु गर्नु दीर्घकालीन रूपमा क्यान्सर, मुटुरोग, श्वासप्रश्वास समस्या तथा मानसिक स्वास्थ्यमा गम्भीर असर पार्ने जोखिम हुन्छ । 

यद्यपि सरकारले सुर्तीजन्य पदार्थ नियन्त्रणका लागि कानून र नीति बनाएको भए पनि कार्यान्वयन पक्ष कमजोर हुँदा किशोर र युवापुस्ता सजिलै यस्ता पदार्थको पहुँचमा पुगिरहेको सरोकारवालाहरू बताउँछन् ।

राष्ट्रिय तथ्यांक कार्यालयको यस सर्वेक्षणले अब सरकार, विद्यालय, अभिभावक र समाज सबै मिलेर किशोर पुस्तालाई सुर्तीजन्य पदार्थबाट जोगाउन प्रभावकारी कार्यक्रम ल्याउनुपर्ने आवश्यकता औँल्याएको छ ।