काठमाडौं- नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ले नेपालमा भूराजनीतिक चहलखेल र हस्तक्षेप प्रयास भइरहेको बताएका छन् ।

काठमाडौं निर्वाचन क्षेत्र नम्बर–५ मा सोमबार आयोजित पार्टी प्रवेश कार्यक्रमलाई सम्बोधनका क्रममा उनले साम्राज्यवादीहरूले विभिन्न देशमा लोकतन्त्र र समाजवादविरूद्ध प्रहार गराउन पपुलिस्टहरूमाथि लगानी गर्ने गरेको बताए ।

प्रचण्डले रवि लामिछाने र बालेन्‍द्र साहलाई लक्षित गर्दै देशलाई कुनै योगदान नगरेकाहरू सामाजिक सञ्जालमा स्टन्ट गरेर राजनीति जित्न अघि बढेको पनि उल्लेख गरेका छन् ।

‘अहिले नेपालमा लोकप्रियतावाद हावी हुन खोजेको छ । सामाजिक सञ्जालमा स्टन्ट गरेका भरमा उनीहरू राजनीतिमा स्थापित हुन खोज्दै छन्’, उनले भने, ‘विश्व साम्राज्यवादले विभिन्न देशमा पपुलिज्मलाई समाजवाद र लोकतन्त्रविरुद्ध प्रहार गराउन लगानी गर्छ । नेपालमा पनि भूराजनीतिक चलखेलबाट हस्तक्षेप कोसिस भइरहेको छ ।’

दाहालले राष्ट्रिय स्वतन्त्र पार्टीतिर संकेत गर्दै पपुलिस्टहरू लोकतन्त्रविरुद्ध विदेशीले प्रयोग गर्ने पात्र भएको कडा टिप्प्णी गरे । उनले २६ वटा घटक मिलेर बनेको नेकपा आगामी चुनावपछि देशकै ठूलो पार्टी बन्ने जिकिर गरे ।