काठमाडौं – नेपाली कांग्रेसको विशेष महाधिवेशनको विरोधमा काठमाडौंका ९ जना सभापतिले संयुक्त विज्ञप्ति जारी गरेका छन् । 

शुक्रबार जारी गरिएको विज्ञप्तिमा विभिन्न निर्वाचन क्षेत्र र महानगर समितिका सभापतिहरूले विशेष महाधिवेशन अवैधानिक भएको दाबी गरेका हुन् ।

काठमाडौंका ८ निर्वाचन क्षेत्रका सभापति तथा काठमाडौं महानगर समितिका एक सभापतिले जारी गरेको सो विज्ञप्तिमा पार्टी विधानअनुसार १५ औँ नियमित महाधिवेशनको प्रक्रिया अघि बढिसकेको अवस्थामा विशेष महाधिवेशन आह्वान गर्नु वैधानिक नहुने उल्लेख गरेका छन् ।

‘वर्तमान संवेदनशील राजनीतिक अवस्थामा विशेष महाधिवेशनको आयोजना पार्टी हित विपरीत हुने र यसले कांग्रेसलाई विभाजनतर्फ लैजान सक्नेछ । आगामी फागुन २९ गते हुने प्रतिनिधि सभा निर्वाचनलाई ध्यानमा राख्दै सबै पार्टीपंक्तिलाई एकताबद्ध भएर चुनावी तयारीमा लाग्न अनुरोध गर्दछौं,’। विज्ञप्तिमा उल्लेख छ । 

केन्द्रीय कार्यसम्पादन समितिबाट भइसकेको आधिकारिक निर्णयको परिधिभित्र रही अघि बढ्नुपर्नेमा उनीहरूको जोड छ ।