काठमाडौं – व्यवसायिक कारणले दुई दिने नेपाल भ्रमणमा आएका सञ्जय दत्तलाई भेटेपछि नेपाल कम्युनिस्ट पार्टीका संयोजक तथा पूर्वप्रधानमन्त्री पुष्पकमल दाहाल प्रचण्डले उनको प्रशंसामा शब्द खर्चिएका छन् ।

प्रचण्डले आफ्नो निजी निवासमा बिहीबार साँझ दत्तसँग भेट गरेका हुन् ।

बलिउड कलाकार दत्त र प्रचण्डको भेटको चासो धेरै गरेको पाइन्छ । क्यासिनो उद्घाटन गर्न काठमाडौं आएका दत्तले प्रचण्डलाई भेटेको तस्बिर सार्वजनिक भएपछि धेरै अचम्मित भएका हुन् ।

अहिले पनि प्रचण्डको सचिवालयले दत्तसँग भेटको कारण सार्वजनिक गरेको छैन ।

प्रचण्डले भने सामाजिक सञ्जालमा ‘आफूलाई मन पर्ने बलिउड नायकसँग संयोग मिल्दा भेटेको’ भन्ने आशयको स्ट्याटस राखेका छन् ।

प्रचण्डले दत्तसँगको भेटघाट निकै अविष्मरणीय बनेको भनेका छन् । साथै, दत्तको फ्यान भएको समेत उल्लेख गरेका छन् ।

प्रचण्डले लेखेका छन्, ‘मुन्ना भाइ एमबीबीएसमा उहाँको अभिनयको म सधैँ प्रशंसक रहेको छु । उहाँसँगको कुराकानी निकै रमाइलो भयो ।’

फिल्म ‘मुन्ना भाइ एमबीबीएस’बाट दत्तले ‘बेस्ट एक्टर’ अवार्ड जितेका थिए । उनको ‘ब्याड ब्याइ’ छबिलाई परिवर्तन गराउने फिल्म पनि यही हो । यो फिल्म सन् २००३ मा प्रदर्शनमा आएको थियो ।

साथै, प्रचण्डले दत्तको नेपाल बसाइँ सुखद रहने भन्ने आशा राखेका छन् ।

दत्तकाे नेपालमा पनि राम्रो फ्यान फलोइङ छ । नेपाली स्टारहरुले पनि उनीसँग फोटो खिचेर सामाजिक सञ्जालमा राखेका छन् ।