काठमाडौं– परराष्ट्रमन्त्री शिशिर खनालसँग नेपालका लागि श्रीलङ्काकी राजदूत रुवान्थी डेल्पिटियाले भेट गरेकी छन् ।

साथै बाढी प्रभावितका लागि श्रीलङ्का सरकारको तर्फबाट १० लाख अमेरिकी डलर आर्थिक सहयोग हस्तान्तरण गरेकी छन् ।

परराष्ट्र मन्त्रालयमा बुधबार भएको भेटमा राजदूत डेल्पिटियाले हालैको विनाशकारी बाढीबाट नेपालमा भएको जनधन तथा पूर्वाधारको क्षतिप्रति श्रीलङ्का सरकार र जनताको तर्फबाट दुःख व्यक्त गरिन्। उनले विपद्को यस घडीमा नेपाल सरकार र नेपाली जनताप्रति श्रीलङ्काको ऐक्यबद्धता रहेको बताइन्।

सहयोग ग्रहण गर्दै परराष्ट्रमन्त्री खनालले विपद्का बेला नेपालप्रति ऐक्यबद्धता जनाउँदै राहत तथा मानवीय प्रयासका लागि आर्थिक सहयोग उपलब्ध गराएकोमा श्रीलङ्का सरकार र जनताप्रति आभार व्यक्त गरे।

मन्त्री खनालले श्रीलङ्काको सहयोगले नेपाल र श्रीलङ्काबीचको गहिरो मित्रता, पारस्परिक सहयोग र सहकार्यलाई प्रतिबिम्बित गरेको बताए। उनले विपद्को कठिन समयमा श्रीलङ्काले देखाएको सद्भाव र सहयोगका लागि नेपाल सरकारका तर्फबाट धन्यवादसमेत व्यक्त गरे।