काठमाडौँ – नेकपा एमालेका महासचिव शंकर पोखरेलले भाद्र २३ र २४ गतेका घटनाको सत्यतथ्य बाहिर ल्याउन निष्पक्ष र उच्चस्तरीय न्यायिक छानबिन अपरिहार्य रहेको बताएका छन् । सामाजिक सञ्जालमार्फत आफ्नो धारणा सार्वजनिक गर्दै महासचिव पोखरेलले स्वार्थी समूहहरूले जेन्जी को भावनामाथि खेलेर सत्य ढाकछोप गरिरहेको आरोप लगाएका हुन्।

भाद्र २३ को घटनालाई नेपालको इतिहासकै अत्यन्तै दुःखद र कालो दिनका रूपमा टिप्पणी गर्दै उनले गैर-जेन्जी समूह, ‘टिओबी’ र ‘हामी नेपाल’ जस्ता समूहहरूले भिडलाई उत्तेजित बनाएको दाबी गरेका छन्। यस्तै, केही राजनीतिक नेतृत्व, चर्चित व्यक्तित्व र भूराजनीतिक चलखेलका कारण स्थिति भड्किएको उनको तर्क छ।

नवयुवामाथि गोली चलाइनु र उनीहरूको ज्यान जानु क्षमाहीन दुःखद विषय भएको उल्लेख गर्दै पोखरेलले घटनाको आडमा भाद्र २४ गते भएका उपद्रव महिनौँदेखिको योजनाबद्ध षड्यन्त्रको परिणाम भएकोबताएका हुन् । हाल जेन्जीका नाममा गैर-जेन्जीकै हुकुम चलिरहेको भन्दै उनले न्यायिक छानबिनपछि मात्र पीडितले वास्तविक न्याय पाउने उल्लेख गरेका छन् ।