काठमाडौँ – प्रमुख प्रतिपक्षी दल नेपाली कांग्रेसका संसदीय दलका नेता भीष्मराज आङ्देम्बेले सरकारका पछिल्ला गतिविधि र अभिव्यक्तिप्रति गम्भीर चिन्ता व्यक्त गरेका छन्।

३२औँ विश्व आदिवासी दिवसका अवसरमा शुभकामना सन्देश जारी गर्दै नेता आङ्देम्बेले सरकारका गतिविधि संविधानले ग्यारेन्टी गरेका उपलब्धिलाई कमजोर बनाउनेतर्फ उन्मुख भएको महसुस हुन थालेको बताएका हुन्।

“सरकारका पछिल्ला गतिविधि र अभिव्यक्ति सङ्घीयता, धर्मनिरपेक्षता, समावेशिता र लोकतान्त्रिक गणतन्त्रलाई बलियो बनाउनेभन्दा कमजोर बनाउने दिशातर्फ त उन्मुख छैनन् भन्ने महसुस हुन थालेको छ,” उनले भनेका छन्।

आङ्देम्बेले सङ्घीयता, धर्मनिरपेक्षता, समानुपातिक समावेशिता, सामाजिक न्याय तथा पहिचानका अधिकार कुनै दल वा सरकारको दयाबाट नभई नेपाली जनताको लामो सङ्घर्ष, त्याग र बलिदानबाट प्राप्त भएको स्पष्ट पारेका छन्। सङ्घीयतालाई बोझका रूपमा चित्रित गर्ने, प्रदेश संरचनामाथि प्रश्न उठाउने तथा समानुपातिक प्रतिनिधित्व कमजोर बनाउने बहसप्रति असन्तुष्टि जनाउँदै उनले कमजोरी भए सुधार गर्न सकिने तर उपलब्धि नै मास्ने कुरा स्वीकार्य नहुने चेतावनी दिए।

आदिवासी जनजातिको पहिचान, भाषा, संस्कृति र अधिकार व्यवहारमै सुनिश्चित गर्दै पहिचानसहितको सङ्घीयतालाई संस्थागत गर्नुपर्नेमा उनले जोड दिएका छन्। विश्व आदिवासी दिवसले समावेशी, समान र न्यायपूर्ण नेपाल निर्माणको सङ्कल्पलाई थप बलियो बनाउने विश्वाससमेत उनले व्यक्त गरेका छन्।