काठमाडाैं – नेकपा (एमाले)ले पार्टी अध्यक्ष तथा प्रधानमन्त्री केपी शर्मा ओलीको नाम र तस्बिर प्रयोग गरी राष्ट्रिय स्वतन्त्र पार्टी (रास्वपा)को सदस्यता पत्र बनाइएको भन्दै गम्भीर आपत्ति जनाएको छ ।

एमालेका प्रचार तथा प्रकाशन विभाग प्रमुख निरज आचार्यले सामाजिक सञ्जाल फेसबुकमार्फत प्रतिक्रिया जनाउँदै अध्यक्ष ओलीको नाम र तस्बिर प्रयोग गरी रास्वपाको सदस्यता पत्रमा टाँस्ने जस्तो निन्दनीय र निकृष्ट कार्यप्रति आफ्नो गम्भीर ध्यानाकर्षण भएको बताएका छन् ।

उनले राजनीतिक वैचारिक प्रतिस्पर्धा आफ्नो ठाउँमा रहे पनि फेक आइडी, फोटोसप तथा भ्रामक सामग्रीको प्रयोग गरेर समाजलाई दिग्भ्रमित पार्ने र शीर्ष नेताहरूको चरित्रहत्या गर्ने प्रयास स्वीकार्य नहुने उल्लेख गरेका छन् ।

आचार्यका अनुसार यस्ता गतिविधि केवल राजनीतिक मर्यादाविपरीत मात्र नभई प्रचलित कानुनअन्तर्गत सजाययोग्य साइबर अपराधसमेत हुन् । उनले विशेषगरी विद्युतीय कारोबार ऐनअन्तर्गत यस्ता कार्य कानुनी कारबाहीको दायरामा पर्ने बताएका छन् ।

सामाजिक सञ्जालमा फैलाइएको उक्त सामग्रीमा ओलीको नामसहित रास्वपाको सदस्यता परिचयपत्र देखाइएको छ । आचार्यले त्यसलाई भ्रामक सामग्री भएको दाबी गर्दै यस्ता हर्कत तत्काल बन्द गर्न सम्बन्धित पक्षलाई चेतावनी दिएका छन् ।

उनले अन्यथा भ्रामक सामग्री उत्पादन र प्रसारणमा संलग्न व्यक्तिहरूको पहिचान गरी कानुनी दायरामा ल्याउन तथा सम्बन्धित निकाय र साइबर ब्यूरोको ध्यानाकर्षण गराइने बताएका छन् ।