ब्रसेल्स- युरोपेली सङ्घ (इयू) ले इरानको इस्लामिक रिभोलुसनरी गार्ड्स कोर्प्स (आईआरजीसी) को नौसैनिक शाखा तथा क्षेत्रीय कमान्डका एक प्रवक्तामाथि नयाँ प्रतिबन्ध घोषणा गरेको छ।

सोमबार सार्वजनिक गरिएको निर्णयअनुसार इयूले आईआरजीसीको नौसैनिक शाखा र हर्मोजगान प्रान्तीय कमान्डका प्रवक्ता मोहम्मद अकबरजादेहलाई कालोसूचीमा समावेश गरेको छ। यससँगै इरानको तेल निर्यातकर्ता युनियनका प्रतिनिधि हमिद होसेनीमाथि पनि सम्पत्ति रोक्का तथा भिसा प्रतिबन्ध लगाइएको इयूले जनाएको छ।

अमेरिका र इरानबीचको द्वन्द्वका कारण प्रमुख समुद्री व्यापार मार्गहरू प्रभावित हुँदा विश्व बजारमा समेत असर परेको पृष्ठभूमिमा इयूले यो कदम चालेको हो।

यसैबीच, युरोपेली राष्ट्रहरू मध्यपूर्वमा जारी तनाव र सैन्य गतिविधि अन्त्य भएपछि हर्मुज क्षेत्रमा नौसैनिक मिसन परिचालन गर्ने तयारीमा जुटेका छन्। उक्त योजनामा फ्रान्स र बेलायतले नेतृत्व गरिरहेका छन्।

इयूकी उच्च विदेश नीति प्रमुख काजा कलसले ‘रेड सी’ क्षेत्रमा कार्यरत इयूको नौसैनिक मिसनलाई सम्भावित नयाँ सैन्य अभियानमा समेत सहभागी गराउन सकिने बताएकी छन्।

मध्यपूर्वमा बढ्दो तनावबीच इयूको पछिल्लो निर्णयलाई क्षेत्रीय सुरक्षा तथा समुद्री मार्गको सुरक्षासँग जोडेर हेरिएको छ।