काठमाडौं- पछिल्लो समय पश्चिमाको सिको गर्दै नेपालमा पनि युवाहरु ‘लिभिङ टुगेदर’ सम्बन्धमा बस्ने गरेका छन् । तर तथ्याङ्कले लिभिङ टुगेदर सम्बन्धमा महिलाको अत्यधिक शोषण भएको पाइएको छ ।

शुक्रबार संयुक्त राष्ट्रसंघीय जनसंख्या कोष (युएनएफपीए) र सञ्चारिका समूह नेपालले संयुक्त आयोजनामा ‘लैङगिक समानता प्रवर्द्धन तथा लैङ्गिक हिंसा अन्त्यका लागि आगामी रणनीतिक विषयमा अन्तक्रिर्या’ कार्यक्रममा महिला, कानुन र विकास मञ्चका अध्यक्ष तथा अधिवक्ता सबिन श्रेष्ठले लिभिङ सम्बन्धलाई लिएर पुरुष सिरियस नरहेको उल्लेख गरेका छन् ।

उनले भने, ‘महिलाहरु लिभिङ सम्बन्धलाई विवाह नै मान्ने गरेका छन् । तर पुरुषहरुको हकमा सिरियस नभएको पाइएको छ । सँगै बस्दाबस्दै गर्भ रहन गएमा लिभिङमा बस्ने अधिकांश पुरुषले विवाह गर्ने नभएर असुरक्षित गर्भपतनलाई जोड दिएको पाइन्छ । यसले महिलाको प्रजनन् अधिकार, स्वास्थ्य र आत्मसम्मानमा प्रहार भएको छ ।’

त्यस्तै श्रेष्ठले नेपालमा ‘लिभिङ टुगेदर’ को सम्बन्धमा महिलाहरु अत्यधिक शोषणमा परेका कारण कानूनी जटिलतालाई सम्बोधन गर्नुपर्ने माग गरे । नेपालमा गोप्य रुपमा सरोगेट हुने गरेको उल्लेख गर्दै उनले महिलाहरुको प्रजनन् अधिकारमाथि राज्यलेनै नै अनदेखा गरेको आरोप लगाएका छन् ।