काठमाडौं- सर्वोच्च अदालतमा ३३ औँ प्रधानन्यायाधीश सिफारिस भएको भोलिपल्ट दुईजना वरिष्ठ न्यायाधीशको पेशी खाली राखिएको छ।

सर्वोच्चले शुक्रबार विभिन्न मुद्दाको दैनिक पेशी सूची कार्यालय समयभन्दा दुई घण्टा ढिला निकाल्दा कायममुकायम प्रधानन्यायाधीश सपना प्रधान मल्ल र प्रधानन्यायाधीशमा सिफारिस डा. मनोजकुमार शर्माको इजलास खाली राखिएको हो ।

बिहीबार मात्रै संवैधानिक परिषद्को बैठकमा प्रधानमन्त्री वालेन्द्र शाहले पहिलो वरीयताकी प्रधानलाई पाखा लगाएर चौथो वरीयताका शर्मालाई भावी प्रधानन्यायाधीशमा सिफारिस गराइसकेका छन् ।

सर्वोच्च अदालतमा कार्यालय खुलेपछि बिहान ९ बजेदेखि १० बजेभित्र पेशी तोकिन्छ । तर शुक्रबार करिब ११ बजे आसपास मात्रै पेशी तोकिएको हो ।

वरीयता मिचेर प्रधानन्यायाधीश सिफारिस भएसँँगै नेपाल बार एसोसियसनले पनि विरोध गरेको छ । कयौँ कानुन व्यवसायीले संवैधानिक परिषद्को निर्णयको विरोध गरेका छन् ।

वरिष्ठ अधिवक्ता दिनेश त्रिपाठीले शुक्रबार अदालत खुल्नेबित्तिकै परिषद्को निर्णय संविधानविपरीत भन्दै रिट लिएर गएका छन् । वरीयता मिचेर प्रन्या तोकिएपछि त्यसको असर निर्णयको भोलिपल्टै अदालतमा देखिएको छ।

दैनिक पेसी सूची हेर्न : सर्वोच्च अदालतको पेसी सूची