काठमाडौं– वीर अस्पतालका लेखा अधिकृत ढुण्डीराज दाहालविरुद्ध घुस लिएको आरोपमा विशेष अदालत काठमाडौंमा आरोपपत्र दायर भएको छ।

अख्तियार दुरुपयोग अनुसन्धान आयोगका अनुसार, विभिन्न सप्लायर्स कम्पनी र ठेकेदारहरूको बिल भुक्तानी गर्ने क्रममा दाहालले घुस लिएको सूचनाका आधारमा टोली खटाएर उनलाई नगदसहित नियन्त्रणमा लिइएको थियो। 

कार्यकक्षमै लुकाइराखिएको अवस्थामा उनलाई १ लाख २० हजार ८५० रुपैयाँसहित पक्राउ गरिएको जनाइएको छ।

अनुसन्धानमा दाहालले अस्पतालको आन्तरिक स्रोतबाट भुक्तानी प्रक्रिया अघि बढाउँदा गैरकानुनी लाभ लिन योजना बनाएर विभिन्न कम्पनी तथा फर्मका प्रतिनिधिसँग घुस लिने–दिने सम्झौता गरेको पुष्टि भएको आयोगले जनाएको छ।

सेवाग्राहीसँग उनले ९३ हजार ८५० रुपैयाँ घुस लिएको प्रमाणित भएको उल्लेख गर्दै अख्तियारले उक्त कार्य भ्रष्टाचार निवारण ऐन, २०५९ को दफा ३९ अनुसार कसुर ठहर गर्दै बिगो कायम गरेको छ। 

आयोगले दाहाललाई बिगो बराबरको जरिवाना र कैद सजाय माग गर्दै विशेष अदालतमा आरोपपत्र दायर गरेको सहायक प्रवक्ता गणेशबहादुर अधिकारीले जानकारी दिए ।