पोखरा- नेकपा (एमाले) संसदीय दलका नेता तथा कार्यवाहक अध्यक्ष रामबहादुर थापा ‘बादल’ले उपाध्यक्ष विष्णुप्रसाद पौडेलमाथि गम्भीर आरोप लगाएका छन् ।

बुधबार (चैत २५) कास्की एमालेले आयोजना गरेको बृहत् कार्यकर्ता भेलालाई सम्बोधन गर्दै नेता बादलले आफूले संसदीय दल नेताको हैसियतमा संसद्मा गरेको सम्बोधनले देशभित्र र बाहिरका पार्टीका दुस्मनहरू एक्स्पोज भएको बताएका हुन् ।

उनले केही दिनअघि उपाध्यक्ष पौडेलले सामाजिक सञ्जालमा व्यक्त गरेको धारणाबारे यस्तो आरोप लगाएका हुन्।

‘अस्ति संसद्को पहिलो बैठकमा मैले दल नेताको हैसियतमा जे कुराहरू भनेँ, तिनलाई लिएर केन्द्रीय सचिवालय बैठक बस्यो । बैठकले अर्को वक्तव्य जारी गर्‍यो,’ बादलले भने, ‘त्यो वक्तव्य आइसकेपछि त्यसले अर्को अलमललको अवस्था बनाएको छ । त्यो वक्तव्य दलको नेताका रुपमा मैले व्यक्त गरेको थिएँ, त्यसले भित्र पनि एउटा कन्फ्युजन क्रिएट गरेको देखियो । पार्टीको उपाध्यक्षले सार्वजनिक रूपमा एउटा स्टेटमेन्ट जारी गर्नुभयो ।’

गत बिहीबारको प्रतिनिधिसभा बैठकमा बादलले राखेको धारणाप्रति उपाध्यक्ष पौडेलले सामाजिक सञ्जालमार्फत् आक्रोश पोखेका थिए ।

सामाजिक सञ्जालमार्फत् पौडेलले एमाले संसदीय दलको नेताका हैसियतमा थापाका विचार पार्टीका स्थापित नीति र मान्यताविपरीत रहेका बताएका थिए ।

यही विषयलाई लिएर बादलले आक्रोश पोखेका हुन् । ‘को-को मान्छेहरू त्यो स्टेटमेन्टबाट उत्तेजित भए, भित्र लुकेका को–को मान्छे बाहिर देखिए, एक्सपोज भए’, उनले भने, ‘संसद्मा मैले दिएको त्यो स्टेटमेन्टले पार्टीभित्रको दक्षिणपन्थी प्रवृत्तिलाई एक्सपोज गरेको मात्रै हो ।’