चितवन– बिक्रीका लागि बुटवल लैजाने क्रममा चितवनबाट आएको हरियो बोडीमा अत्यधिक मात्रामा विषादी फेला परेपछि जफत गरी नष्ट गरिएको छ।

बुटवल कृषि उपज थोक बजार केन्द्रमा बुधबार तरकारी र फलफूलको नमूना संकलन गरी परीक्षण गर्दा बोडीमा विषादीको मात्रा नियमभन्दा धेरै भएको पाइएको हो। 

विषादी अवशेष द्रुत विश्लेषण प्रयोगशाला इकाई बुटवलले नमूनाको परीक्षण गर्दा अर्गानोक फस्टफोरेष्ट समूहको विषादी ९७.०६७ प्रतिशतसम्म भेटिएको प्राविधिक सहायक राजीव भण्डारीले जानकारी दिए।

बुटवल उपमहानगरपालिकासँग समन्वय गरी विषादीयुक्त १२० केजी बोडी डम्पिङ साइटमा लगेर नष्ट गरिएको थियो। भण्डारीका अनुसार, शून्यदेखि ३५ प्रतिशतसम्मको विषादी उपभोग योग्य मानिन्छ, ३५–४५ प्रतिशतको स्तरमा केही दिन क्वारेन्टाइनमा राखेर पुनः परीक्षण गरिन्छ, तर ४५ प्रतिशतभन्दा माथि पुगेको तरकारी अनिवार्य रूपमा नष्ट गरिन्छ।