काठमाडौं– रास्वपा सांसद जगदीश खरेलले जेन-जी युवाहरूसँग यसअघिको सरकारले गरेको १० बुँदे सम्झौता अक्षरस पालना गर्न सरकारको ध्यानाकर्षण गराएका छन् ।  

बुधबार प्रतिनिधिसभा बैठकमा बोल्दै सांसद खरेलले जेनजी युवाहरूको बलिदानकै कारण मुलुक नयाँ अवस्थामा प्रवेश गरेको भन्दै जेन-जी युवाहरूसँग भएको सम्झौता सम्झौता अक्षरस पालना गर्न सरकारको ध्यानाकर्षण गराएका हुन् । १० बुँदे सम्झौता यताउता भए स्वीकार्य नहुने उनको भनाइ छ ।

खरेलले तोकिएको समयमा नै निर्वाचन सम्पन्न भएका कारण संसद्मा पुराना पातहरू हट्दै गएको र नयाँ पालुवा पलाएको धारणा राखे ।

जेन-जी आन्दोलनपछि मुलुकमा राजनीति र राजनीति नेतृत्वको परिभाषा नै परिवर्तन भएको भन्दै सांसद खरेलले परिभाषा परिवर्तन गर्ने नायक रवि लामिछाने भएको उल्लेख गरे । 

उनले सार्वभौम व्यवस्थापिका संसदलाई कार्यपालिकाको छाया बन्ने अवस्था आउन नदिन सबै प्रतिबद्ध हुनुपर्ने समेत बताए ।