काठमाडौँ – परराष्ट्र मन्त्रालयले सरकारका मन्त्रीका लागि ‘परराष्ट्र मामिला तथा कूटनीतिक आचारसंहिता’ सम्बन्धी विशेष कार्यक्रम आयोजना गरेको छ। बुधबार बिहान प्रधानमन्त्री तथा मन्त्रिपरिषद्को कार्यालय, सिंहदरबारमा उक्त कार्यक्रम जारी छ।

प्रधानमन्त्रीको निजी सचिवालयका अनुसार कार्यक्रममा विभिन्न मन्त्रालयका मन्त्रीहरूको उपस्थिति रहेको छ। कूटनीतिक मर्यादा, आचारसंहिताको महत्व र यसको प्रभावकारी कार्यान्वयनका विषयमा परराष्ट्र मन्त्रालयका अधिकारीले मन्त्रीलाई जानकारी गराउने कार्यक्रम रहेको प्रधानमन्त्रीका प्रेस विज्ञ दिपा दाहालले जानकारी दिइन् ।

पछिल्लो समय बदलिँदो परिवेश र समसामयिक परराष्ट्र मामिलाका विविध पक्षबारे कार्यक्रममा केन्द्रित छलफल भइरहेको दाहालको भनाइ छ।

कूटनीतिक भेटघाट र विदेशी नियोगसँगको समन्वयलाई थप व्यवस्थित र मर्यादित बनाउन यो कार्यक्रम आयोजना गरिएको प्रधानमन्त्रीको सचिवालयले जनाएको छ ।