काठमाडौं- पाकिस्तान र अफगानिस्तानबीचको सीमा क्षेत्रमा विगत केही दिनदेखि जारी भीषण गोलाबारी र सशस्त्र संघर्षका कारण हजारौँ परिवार विस्थापित भएका छन् । यो पछिल्लो केही वर्षयताकै सबैभन्दा खराब सीमा द्वन्द्व मानिएको छ । यस द्वन्द्वमा दुवै देशका सेनाले भारी हतियार, ड्रोन, हवाई हमलाको प्रयोग गरिरहेका छन् ।

द्वन्द्वका कारण विशेषगरी सीमावर्ती क्षेत्रका सर्वसाधारण मारमा परेका छन् । पछिल्लो समय पाकिस्तानले अफगानिस्तानका मुख्य सहरहरू र सैन्य अखडाहरूमा हवाई आक्रमण गरेपछि यो तनावले ‘खुल्ला युद्ध’ को रूप लिएको हो ।

पाकिस्तानले आफ्नो भूमिमा आक्रमण गर्ने चरमपन्थी समूहहरूलाई अफगानिस्तानले संरक्षण दिएको आरोप लगाउँदै आएको छ भने तालिबान सरकारले त्यसलाई अस्वीकार गर्दै आफ्नो सार्वभौमिकतामाथि प्रहार भएको बताएको छ । यसै क्रममा अफगानिस्तानले पाकिस्तानको रावलपिण्डीस्थित नूर खान एयरबेस र अन्य सैन्य क्षेत्रहरूमा ड्रोनमार्फत जवाफी प्रहार गरेको दाबी गरेको छ ।

रमजानको पवित्र महिनामा भइरहेको यो युद्धले मानवीय संकट झन् गहिरो बनाएको छ । स्थानीय बासिन्दाका अनुसार दिउँसो शान्त भए पनि साँझ ‘इफ्तार’ (व्रत तोड्ने समय) को बेला गोलाबारी तीव्र हुने गरेको छ ।

संयुक्त राष्ट्र संघ र अन्य मानव अधिकारवादी संस्थाहरूले हालसम्म १ लाख १५ हजारभन्दा बढी मानिस विस्थापित भइसकेको र दर्जनौँ सर्वसाधारणले ज्यान गुमाएको बताएका छन् । टर्की र चीन जस्ता देशहरूले यस द्वन्द्व अन्त्यका लागि मध्यस्थताको प्रस्ताव गरे पनि सीमामा तनाव अझै कम हुन सकेको छैन ।