काठमाडौं – नेपालसँगको खेलमा उत्कृष्ट अलराउन्ड प्रदर्शन गरेका इंग्ल्याण्डका युवा स्टार विल ज्याक्स ‘प्लेयर अफ दि म्याच’ घोषित भएका छन् । आक्रामक ब्याटिङसँगै बलिङमा पनि प्रभाव जमाएका ज्याक्सले इंग्ल्याण्डको जितमा निर्णायक भूमिका खेले ।

ज्याक्सले १८ बलमा ३९ रनको तीव्र पारी खेलेका थिए भने आफ्नो पार्ट–टाइम स्पिनमार्फत नेपालका ओपनर कुशल भुर्तेलको महत्वपूर्ण विकेट लिन सफल भए । खेलपछि पुरस्कार ग्रहण गर्दै उनले नेपाली टोलीको खुलेर प्रशंसा गरे।

ज्याक्सका अनुसार वानखेडेको पिच चुनौतीपूर्ण भए पनि नेपाली ब्याट्सम्यानहरूले स्पिन बलिङको सामना निकै आत्मविश्वासका साथ गरे । उनले नेपालले खेलभर इंग्ल्याण्डलाई दबाबमा राखेको स्वीकार गरेका छन्।

‘नेपालले आज उत्कृष्ट क्रिकेट खेल्यो। पिच सजिलो थिएन, तर उनीहरूले स्पिनलाई राम्रोसँग खेल्दै हामीलाई अन्तिम क्षणसम्म चुनौती दिए,’ ज्याक्सले भने। ‘मैले बललाई राम्रोसँग हेरेर सरल शैलीमा खेलेँ, अनावश्यक जोखिम लिइनँ। अन्तिम ओभरतिर उनीहरूको रणनीति छलफल देख्दा उनीहरू निकै योजनाबद्ध टोली भएको महसुस भयो।’

ज्याक्सले भविष्यमा यस्तै कठिन पिचहरूमा खेल्नु परेमा इंग्ल्याण्ड टोलीको अनुकूलन क्षमता महत्वपूर्ण हुने पनि उल्लेख गरे।