काठमाडौं– फागुन २१ गते हुन लागेको प्रतिनिधि सभाको निर्वाचनको लागि मोरङमा निर्वाचन सामग्री प्याकिङ गर्न थालिएको छ ।  

विराटनगरस्थित प्रदेश निर्वाचन कार्यालयमा ३७ प्रकारका मतदान सामग्रीहरू प्याकिङ शुरु गरिएको र निर्वाचन आयोगबाट उपलब्ध हुने सामग्री प्राप्त भएपछि सबै सामग्री एकमुष्ट मतदान अधिकृतहरूलाई वितरण गरिने प्रदेश निर्वाचन कार्यालय विराटनगरले जनाएको छ । 

३७ प्रकारका मतदान सामग्रीमा अनुसूची फारम, परिचय पत्र, सियो धागो, लाहा, स्वस्तिक छाप, मतपत्र प्याकिङ गर्ने झोला लगायतका सामग्री रहेको प्रदेश निर्वाचन कार्यालय विराटनगरका सूचना अधिकारी तीर्थ अधिकारीले जानकारी दिए । 

उनले ३७ प्रकारका सामग्रीहरू स्थानीय बजारबाट खरिद गरिएको र बाँकी १५ वटा सामग्रीहरू केन्द्रबाट आउने जानकारी दिए ।

मोरङमा एउटा महानगरपालिका, ८ वटा नगरपालिका र ८ वटा गाउँपालिकाहरूमा ३ सय ६ वटा मतदान स्थल र ८ सय ८८ वटा मतदान केन्द्र रहेका छन् । 

मतदान अधिकृत तथा सहायक मतदान अधिकृतहरूलाई दुई दिने तालिम दिएपछि नियुक्ति पत्रका साथै निर्वाचन सामग्री, मतपत्र, रकम हस्तान्तरण गरी सम्बन्धित मतदान केन्द्रमा पठाइने बताइएको छ ।