वासिङ्टन- अमेरिकी राष्ट्रपति डोनाल्ड ट्रम्पले भेनेजुएलाले नयाँ तेल सम्झौताबाट प्राप्त हुने रकमले अमेरिकामा मात्रै बनेका सामान खरिद गर्ने बताएका छन्।

ट्रम्पले सामाजिक सञ्जाल प्लेटफर्म ‘ट्रुथ सोसल’ मा लेखेका छन्, ‘मलाई जानकारी दिइएको छ कि भेनेजुएलाले हाम्रो नयाँ तेल सम्झौताबाट प्राप्त रकमले अमेरिकामा बनेका सामान मात्रै खरिद गर्नेछ।’

उनले ती खरिदमा अमेरिकी कृषि उत्पादन, औषधि, मेडिकल उपकरण तथा भेनेजुएलाको विद्युत् ग्रिड र ऊर्जा केन्द्र सुधारका लागि आवश्यक मेसिनरी समावेश हुनेछन्।

ट्रम्पले भने, ‘अर्को शब्दमा भन्नुपर्दा भेनेजुएलाले अब अमेरिकालाई आफ्नो मुख्य व्यापारिक साझेदार बनाउने प्रतिबद्धता जनाएको छ। यो समझदारीपूर्ण निर्णय हो । भेनेजुएला र अमेरिका दुवै देशका जनताका लागि राम्रो कुरा हो।’

यसअघि अमेरिकाले गत शनिबार भेनेजुएलाका राष्ट्रपति निकोलस मादुरो र उनकी पत्नी सिलिया फ्लोरेसलाई राजधानी काराकासबाट अपहरण गरी लगेको थियो।

त्यसपछि डेल्सी रोड्रिगेजलाई भेनेजुएलाकी कार्यवाहक राष्ट्रपति नियुक्त गरिएको छ। उनी यसअघि उपराष्ट्रपति थिइन्।