काठमाडौं- देशकै ठूलोमध्ये एक नेपाली कांग्रेस विभाजनतिर अघि बढेको छ। महामन्त्रीद्वय गगनकुमार थापा र विश्वप्रकाश शर्माले यही पुस २७ र २८ गते दोस्रो विशेष महाधिवेशन बोलाएपछि संस्थापन पक्षले केन्द्रीय सदस्यहरूको भेला गर्न लागेको हो ।

संस्थापन पक्षले शुक्रबार केन्द्रीय सदस्यहरूको भेला बोलाएको छ। सभापति शेरबहादुर देउवासँग बिहीबार भएको छलफलपछि संस्थापन पक्षले केन्द्रीय सदस्यहरूको भेला बोलाउने निर्णय गरेको हो ।

देउवासँगको छलफलपछि एकजना केन्द्रीय सदस्यले दिएको जानकारी अनुसार शुक्रबार बिहान साढे १० बजे नयाँ बानेश्वरमा उक्त भेला आयोजना गरिएको बताए । त्यस भेलामा संस्थापन पक्षतिरका शीर्ष नेताहरूलाई डाकिएको छैन ।

‘शुक्रबार साढे १० बजे संस्थापन पक्षका केन्द्रीय सदस्यहरू जुट्दैछौँ । यो भेलामा शीर्ष नेताहरूलाई डाकेका छैनौँ’, उनले भने, ‘संस्थापन पक्षीय २५ जना केन्द्रीय सदस्यहरूको समूह पनि यसमा सहभागी हुने छ ।’

विशेष महाधिवेशन र नियमित महाधिवेशनलाई लिएर विवाद चर्किँदै जाँदा संस्थापन पक्षीय केन्द्रीय सदस्यहरूले पटक पटक छलफल गरिसकेका छन् ।

उनीहरू र शीर्ष नेताबीच यसअघि पटक पटक भेला र छलफल भइसकेका छन् । संस्थापन पक्षीय नेताहरू आगामी फागुन २१ गते हुने प्रतिनिधिसभाको निर्वाचनअगाडि पन्ध्रौँ महाधिवेशन नगर्ने पक्षमा दृढ छन् ।

यसअघि पुस १८ मा बसेको कांग्रेसको केन्द्रीय कार्यसम्पादन समितिको बैठकले महामन्त्रीद्वयले आह्वान गरेको विशेष महाधिवेशनलाई खारेज गरिसकेको छ । कांग्रेसको बहुमत पक्षले आगामी वैशाख २८ देखि ३१ गतेसम्म पन्ध्रौँ महाधिवेशनको नयाँ मिति तय गरिसकेको छ।

तर त्यसविरुद्ध विशेष महाधिवेशनका लागि हस्ताक्षर गरेका ५४ प्रतिशत महाधिवेशन प्रतिनिधि जुटाएर महामन्त्रीद्वयले विशेष महाधिवेशनको औपचारिक तयारी गरिसकेका छन् । विशेष महाधिवेशनका लागि १८ वटा उपसमिति पनि निर्माण गरिएको छ। यदि विशेष महाधिवेशनमा बहुमत जुटेमा यहीँबाट नयाँ कार्यसमिति पनि घोषणा हुन सक्नेछ ।

यता संस्थापन पक्ष पनि नयाँ नयाँ रणनीति बनाउन जुटेको छ। संस्थापनले विशेष महाधिवशेनलाई चुनौती दिँदै आगामी पुस २७ गते नै काठमाडौंमा युवा भेला गर्न लागेको छ।

उक्त युवा भेला पुस २७ गते बिहान बिहान साढे ११ बजे ललितपुरको सानेपास्थित केन्द्रीय कार्यालय, बीपीनगरबाट सुरू गरिने भएको छ।

‘आमनिर्वाचन, १५ औँ महाधिवेशन र युवाको भूमिका’ मूलनारासहित उक्त युवा भेला आयोजना गर्न लागिएको हो । उक्त भेलाको आयोजकका रुपमा भ्रातृ संगठनहरूलाई राखिएको छ । भेलाको संयोजन नेपाल तरूण दलका अध्यक्ष विद्धान गुरूङले गर्ने भएका छन् ।