काठमाडौं– नेपाली कांग्रेस विशेष महाधिवेशन पक्षधरले यही पुस २७ र २८ गते आह्वान गरेको विशेष महाधिवेशनमा सो पार्टीको सिन्धुपाल्चोक र बाँके जिल्लाले पनि विज्ञप्ति निकालेर समर्थन जनाएका छन् । 

कांग्रेस सिन्धुपाल्चोकका सभापति अंगबहादुर लामा र बाँकेको सभापति नारायणप्रसाद गौडेलले विज्ञप्ति जारी गर्दै विशेष महाधिवेशन सफल बनाउन आह्वान गरेका हुन् ।

नेपाली कांग्रेसमा विशेष महाधिवेशन गर्ने र नगर्ने विषयमा कांग्रेसमा मतभेद बढ्दै जाँदा पार्टीको माथिदेखि तलसम्मका नेता तथा कार्यकर्ता ध्रुवीकृत भएर आफ्नो धारणा सार्वजनिक गर्ने गरिरहेका छन् । 

सोही क्रममा बिहीबार एकपछि अर्को गर्दै धेरै जिल्लाका सभापतिहरूले विशेष महाधिवेशनको पक्षमा विज्ञप्ति जारी गरेको देखिएको छ ।