काठमाडौँ- मलेसियाको जोहोर राज्यमा वायु प्रदूषणको स्तर बढेपछि विद्यार्थीको स्वास्थ्य र सुरक्षालाई ध्यानमा राख्दै बिहीबार र शुक्रबार सबै विद्यालय बन्द गरिएको छ।

राज्यका विभिन्न क्षेत्रमा पछिल्ला दिनमा धुवाँ बढ्नुका साथै वायु गुणस्तर लगातार बिग्रिएपछि सावधानीस्वरूप विद्यालय बन्द गर्ने निर्णय गरिएको हो।

जोहोर शिक्षा तथा सूचना समितिका अध्यक्ष मुहम्मद नकीब मोहम्मद गजालीले बुधबार जारी गरेको विज्ञप्तिमा विद्यार्थीको स्वास्थ्य र सुरक्षाको संरक्षणका लागि विद्यालय बन्द गरिएको जनाएका छन्।

विद्यालय बन्द हुँदा जोहोरका एक हजार १९८ विद्यालय प्रभावित भएका छन्। यसबाट ६ लाख १७ हजार २५८ विद्यार्थीको नियमित पठनपाठन प्रभावित भएको छ।

बिहीबार बिहान १० बजे जोहोरको सेगमट क्षेत्रमा वायु प्रदूषण सूचकाङ्क (एपीआई) १८७ पुगेको थियो। यो अस्वास्थ्यकर वायु गुणस्तरको स्तर हो।

राजधानी क्वालालम्पुरसहित मलेसियाका ३८ क्षेत्रमा पनि अस्वास्थ्यकर एपीआई स्तर रेकर्ड गरिएको छ। बढ्दो धुवाँ र वायु प्रदूषणले स्वास्थ्यमा जोखिम बढाउन सक्ने भएकाले जोहोरमा विद्यालय बन्द गर्ने निर्णय गरिएको अधिकारीहरूले बताएका छन्।