एजेन्सी– युरोप पुग्ने प्रयासमा एट्लान्टिक महासागरको जोखिमपूर्ण मार्ग हुँदै यात्रा गरिरहेका एक हजार भन्दा बढी आप्रवासीलाई पश्चिम अफ्रिकाको तटीय क्षेत्रबाट एक साताभित्र उद्धार गरिएको ‘डाक्टर्स विदाउट बोर्डर्स’ (एमएसएफ)ले जनाएको छ ।

सोमबार जारी विज्ञप्तिमा एमएसएफले जनाएअनुसार, उद्धार गरिएका एक हजार ४६ जना सातवटा डुङ्गामा सवार थिए । ती सबै डुङ्गा गाम्बियाबाट स्पेनको क्यानरी टापुतर्फ जाँदै गर्दा समुद्रमा अलपत्र परेका थिए ।

अगस्टको अन्तिम साता उद्धार गरिएका उनीहरूलाई मौरिटानियाको नोआधिबु तथा सेनेगलका रोसो र डाकारमा ल्याइएको एमएसएफले जनाएको छ ।

वर्षौँदेखि हजारौँ मानिस, विशेषगरी युवा, क्यानरी टापु हुँदै युरोप पुग्ने प्रयासमा अत्यधिक यात्रु बोकेका र प्रायः जीर्ण अवस्थामा रहेका डुङ्गामार्फत एट्लान्टिक महासागरको जोखिमपूर्ण यात्रा गर्दै आएका छन् ।

युरोपेली मुलुकले भिसा जारी गर्ने प्रक्रियामा कडाइ गर्नुका साथै सीमामा निगरानी र नियन्त्रण बढाएपछि गरिबी तथा कठिन परिस्थितिबाट भाग्न खोज्ने धेरै मानिस असुरक्षित र अवैध समुद्री मार्ग रोज्न बाध्य भएका छन् ।

एमएसएफका अनुसार उद्धार गरिएकामध्ये धेरैमा गम्भीर जलवियोजन, बेहोसी, हड्डी भाँचिएको, अत्यधिक थकान तथा छाला, पेट र श्वासप्रश्वाससम्बन्धी सङ्क्रमण देखिएको थियो ।

यात्राका क्रममा आफ्ना प्रियजनको मृत्यु देखेका कारण धेरै आप्रवासीमा गहिरो मनोवैज्ञानिक असर परेको पनि एमएसएफले जनाएको छ । उद्धार गरिएकामध्ये १३४ जना महिला थिए, जसमा एक गर्भवती महिला पनि थिइन् । त्यस्तै, ८८ जना बालबालिका तथा नाबालिग रहेको संस्थाले जनाएको छ ।

उनीहरूमध्ये अधिकांश सेनेगल र गाम्बियाका नागरिक थिए भने केही माली, गिनी, आइभरी कोस्टलगायत अन्य देशका नागरिक पनि थिए ।

एमएसएफका अनुसार धेरै आप्रवासीले आफ्नै देशमा तथा युरोप पुग्ने क्रममा हिंसाको सामना गर्नुपरेको बताएका छन् ।