काठमाडौं– नेपालमा आयोजना गर्न लागिएको तिब्बतसँग सम्बन्धित अन्तर्राष्ट्रिय कार्यक्रम अब अनलाइन माध्यमबाट हुने भएको छ । यसअघि परराष्ट्रसचिव अमृतबहादुर राईसँगको परामर्शमा मुख्यसचिव गोविन्दबहादुर कार्कीले आयोजकमध्येको काठमाडौं विश्वविद्यालयका अधिकारीहरुलाई डाकेर नेपालमा उक्त कार्यक्रम नगर्न निर्देशन दिएको समाचार सार्वजनिक भएको थियो ।

धुलिखेल र राजधानीमा अगष्ट २३ देखि २९ सम्म आयोजना हुने भनिएको इन्टरनेशनल एशोसिएसन फर टिबेटियन स्टडिज (आईएटीएस) को सम्मेलन अब अनलाइन माध्यमबाट गरिने छ । आईएटीएसले नेपालमा तय भएको कार्यक्रम स्थगित हुनुलाई ‘अत्यन्त खेदजनक र चिन्ताजनक घटनाक्रम’ को संज्ञा दिएको छ ।

आईएटीएसकी कार्यवाहक प्रमुख तथा फ्रान्सको पूर्वीय भाषा तथा सभ्यता मामिलाका लागि राष्ट्रिय प्रतिष्ठानमा तिब्बती–शास्त्रकी प्राध्यापक फ्रास्वाँ रोबेनलाई उद्धृत गर्दै समाचार संस्था एएफपीले जनाएअनुसार अब यो कार्यक्रम अनलाइन माध्यमबाट हुनेछ ।

कार्यक्रमको तयारी जारी रहेको उनले जानकारी दिएकी छिन् ।