काठमाडौँ- काठमाडौंको तारकेश्वर नगरपालिका–६ पैयुटारमा घरायसी विवादका क्रममा श्रीमतीमाथि धारिलो हतियार प्रहार गरी हत्या गरेको आरोपमा आइतबार थप तीनजनालाई प्रहरीले पक्राउ गरेको छ।

जिल्ला प्रहरी परिसर काठमाडौंका अनुसार जेठ २२ गते राति करिब ९:३० बजे ‘नेपाली ब्रो’ नामले चिनिने ३८ वर्षीय कुमार थापा मगरले श्रीमतीमाथि चक्कु प्रहार गरेका थिए।

घटनामा गम्भीर घाइते भएकी महिलालाई तारकेश्वर सिटी अस्पताल हुँदै थप उपचारका लागि त्रिवि शिक्षण अस्पताल महाराजगञ्ज लगिएको थियो। उपचारकै क्रममा उनको मृत्यु भएको प्रहरीले जनाएको छ।

घटनापछि प्रहरीले त्यही राति कुमार थापा मगरलाई पक्राउ गरेको थियो। घटनामा संलग्न रहेको आरोपमा किटानी जाहेरीमा अन्य तीन जनालाई पनि शनिबार पक्राउ गरिएको प्रहरीले जनाएको छ।

पक्राउ पर्नेमा नुवाकोट तारकेश्वर गाउँपालिका–४ घर भई हाल तारकेश्वर–५ पैयुटार बस्ने ३६ वर्षीय विक्रम थापा मगर, काठमाडौं महानगरपालिका–१६ बालाजु बस्ने ४० वर्षीय पुजन थापा क्षेत्री र जुम्लाको हिमा गाउँपालिका–१ घर भई हाल गोकर्णेश्वर नगरपालिका–८ बस्ने २५ वर्षीया प्रतिक्षा आचार्य छन्।

प्रहरीले चारै जनाविरुद्ध काठमाडौं जिल्ला अदालतबाट पाँच दिनको म्याद थप गरी घटनाबारे थप अनुसन्धान भइरहेको जनाएको छ।