काठमाडौं- कीर्तिपुरको राधास्वामीस्थित होल्डिङ सेन्टरमा जन्मिएका एक नवजात शिशुमा निमोनिया संक्रमण देखिएको छ । केही दिनअघि जन्मेका शिशुमा कडा किसिमको निमोनिया देखिएको हो ।

हाल शिशुको थापाथलीस्थित प्रसूति गृहको आईसीयूमा उपचार भइरहेको छ । केही दिनअघि स्वस्थ रूपमा जन्मिएका शिशुमा अचानक कडा खालको निमोनिया देखिएपछि उनलाई नवजात शिशु सघन उपचार कक्ष (एनआईसीयू) मा भर्ना गरिएको थियो । अस्पतालमा उपचाररत शिशुको स्वास्थ्य अवस्था अहिले सुधार हुँदै गएको अस्पतालका एक कर्मचारीले खबरहबलाई जानकारी दिए ।

आफू सञ्चार माध्यमसँग कुरा गर्ने आधिकारिक व्यक्ति नभएको बताएपछि खबरहबले ती कर्मचारीको नाम गोप्य राखेको छ ।

आफन्तहरूका अनुसार उपचारपछि शिशुको स्वास्थ्यमा सकारात्मक परिवर्तन देखिएको छ र अवस्था पहिलेभन्दा धेरै राम्रो बनेको छ । सानै उमेरमा शल्यक्रियामार्फत बच्चा जन्मिएको र त्यसमाथि आमाले पोषिलो खानेकुराहरु केही खान नपाएको आफन्तहरुको गुनासो छ ।

राधास्वामी सत्संग भित्रै होल्डिङ सेन्टर भएकाले माछा, मासु, अण्डा जस्ता पोषिलो खानेकुराहरु खान नपाएकाले आमा र बच्चा दुवैको स्वास्थ्य अवस्था कमजोर बनेको उनीहरुको आरोप छ ।