काठमाडौं- गत भदौ २४ गते भएको जेन-जी आन्दोलनका क्रममा भद्र बन्दीगृह सुन्धाराबाट फरार भएका एकजन कैदी ८ महिनापछि पक्राउ परेका छन् ।

कर्तव्य ज्यान मुद्दाका फरार प्रतिवादी काभ्रेको पाँचखाल नगरपालिका-७ बस्ने खोटाङ घर भएका ४३ वर्षीय धिरज उपनामका मोतिधन राईलाई मंगलबार प्रहरीले पक्राउ गरेको हो ।

जिल्ला अदालत काठमाडौंको २०७६ असोज १ गतेको फैसलाले उक्त मुद्दामा जन्मकैद सजाय ठहर भई कैद भुक्तानको लागि उनी केन्द्रीय कारागार भद्रबन्दी गृह सुन्धारामा थिए ।

तर जेन-जी आन्दोलनका क्रममा उनी गत भदौ २४ गते कारागारबाट फरार भएका थिए ।

उनलाई काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले काभ्रेको पाँचखाल नगरपालिका-७ शिखरपुरबाट पक्राउ गरेर फेरि जेलमा पठाएको हो ।

उनलाई आवश्यक कारबाहीको लागि केन्द्रीय कारागार जगन्नाथदेवल सुन्धारा पठाइएको छ ।