काठमाडौँ– इरान र अमेरिकाबीच जारी युद्धलाई औपचारिक रूपमा अन्त्य गर्न अमेरिकाले अघि सारेको नयाँ प्रस्तावमाथि इरानले विचार गरिरहेको जनाएको छ ।

इरानी विदेश मन्त्रालयका प्रवक्ता इस्माइल बाघेईले अमेरिकी प्रस्ताव अझै समीक्षाको चरणमा रहेको र यसबारे आफ्नो अन्तिम धारणा पाकिस्तानी मध्यस्थकर्तामार्फत जानकारी गराइने बताएका छन् ।

ह्वाइट हाउसले दुवै पक्ष १४ बुँदे समझदारी पत्रको निकै नजिक पुगेको दाबी गरेपछि इरानको यो प्रतिक्रिया आएको हो ।

अमेरिकी सञ्चारमाध्यम एक्सियोसका अनुसार समझदारी पत्रले आगामी एक महिनाका लागि वार्ताको खाका तयार गर्नेछ । प्रस्तावमा इरानको परमाणु संवर्धनमा रोक लगाउने, इरानमाथि लागेका आर्थिक प्रतिबन्धहरू हटाउने र रणनीतिक महत्त्वको ‘स्ट्रेट अफ हर्मोज’मा जहाजहरूको आवागमन पुनः सुचारु गर्ने जस्ता महत्त्वपूर्ण बुँदाहरू रहेको बीबीसीले उल्लेख गरेको छ ।

इरानी संसदको राष्ट्रिय सुरक्षा समितिका प्रवक्ता इब्राहिम रेजाईले अमेरिकी प्रस्तावलाई ‘इच्छाको सूची’ मात्र भएको टिप्पणी गरेका छन् । उनले सामाजिक सञ्जाल एक्समा लेख्दै भनेका छन्– ‘इरानको औँला ट्रिगरमै छ र हामी तयार छौँ । यदि अमेरिकाले आवश्यक सहुलियत दिएन भने इरानले कडा जवाफ दिनेछ ।’

हाल अमेरिका र इजरायलले इरानमा सुरु गरेको ‘अपरेशन एपिक फ्युरी’ सम्पन्न भएको घोषणा गरिए पनि नयाँ सम्झौता नभएमा फेरि आक्रमण सुरु हुन सक्ने खतरा भने कायमै छ । दुवै पक्ष अहिले पाकिस्तानी मध्यस्थतामा हुने अर्को वार्ताको पर्खाइमा छन् ।

यता, वार्ताको वातावरण बने पनि दुवै पक्षबाट चेतावनी दिने क्रम भने रोकिएको छैन । अमेरिकी राष्ट्रपति डोनल्ड ट्रम्पले पछिल्लो २४ घण्टामा इरानसँग राम्रो कुराकानी भएको र सम्झौताको सम्भावना रहेको बताए पनि कडा चेतावनी दिएका छन् । ट्रम्पले सामाजिक सञ्जाल ट्रुथ सोसलमा भनेका छन्– ‘यदि इरान सम्झौतामा सहमत भएन भने फेरि बमबारी सुरु हुनेछ, जुन पहिलेको भन्दा अझ बढी तीव्र र भयानक हुनेछ ।’

ट्रम्पले इरान परमाणु हतियार कहिल्यै नबनाउन सहमत भएको दाबी गरे पनि तेहरानले यसको आधिकारिक पुष्टि भने गरेको छैन ।