काठमाडौं- बङ्गलादेशको शिविरमा रहेका लाखौँ रोहिंग्या शरणार्थीहरूका लागि उपलब्ध गराइँदै आएको खाद्यान्न सहायतामा कटौती गरिएको छ। यस निर्णयले शिविरमा बसोबास गर्ने समुदायमा त्रास र चिन्ता बढाएको छ। हाल १२ लाख रोहिंग्या शरणार्थीहरू बङ्गलादेशका भिडभाडयुक्त शिविरमा बसिरहेका छन्। उनीहरूले प्रतिव्यक्ति मासिक १२ डलर सहायता पाउँदै आएका थिए।

संयुक्त राष्ट्रसंघीय विश्व खाद्य कार्यक्रमले नयाँ प्रणाली लागू गर्दै सहायता रकममा हेरफेर गरेको छ। अब परिवारको आवश्यकताको गम्भीरता हेरेर सहायता बाँडिनेछ। यसअनुसार करिब १७ प्रतिशत जनसंख्याले मासिक मात्र ७ डलर पाउनेछन्। बालबालिकाले नेतृत्व गरेका परिवार जस्ता ‘अत्यधिक असुरक्षित’ समूहले भने पुरानै १२ डलर पाइरहनेछन्। शरणार्थीहरूले ७ डलरले बाँच्न र छोराछोरी पाल्न असम्भव हुने गुनासो गरेका छन्।

सन् २०१७ मा म्यानमारको सैनिक दमनपछि भागेर आएका रोहिंग्याहरूलाई बङ्गलादेशमा काम गर्न कानुनी प्रतिबन्ध छ। त्यसैले उनीहरू पूर्ण रूपमा मानवीय सहायतामा निर्भर छन्। अमेरिका लगायतका देशहरूले वैदेशिक सहायतामा कटौती गरेपछि खाद्य कोषमा पनि ठुलो दबाब परेको थियो। यद्यपि, एजेन्सीले यसलाई ‘रासन कटौती’ नभई ‘न्यायोचित वितरण’ भनेको छ।