काठमाडौँ – गृहमन्त्री सुधन गुरुङले आगामी आर्थिक वर्ष २०८३/८४ को वार्षिक नीति तथा कार्यक्रम तर्जुमासम्बन्धी छलफललगत्तै त्रिभुवन अन्तर्राष्ट्रिय विमानस्थल र विपद् व्यवस्थापनको तयारीबारे आकस्मिक अनुगमन गरेका छन् ।

लगातारको वर्षाका बीच सोमबार राति करिब साढे १० बजे गृहमन्त्री गुरुङले सिनामंगलस्थित सशस्त्र प्रहरी बलको विपद् उद्धार गण नम्बर २० को स्थलगत निरीक्षण गरेका हुन् । अनुगमनका क्रममा उनीसँगै नेपाल प्रहरी र सशस्त्र प्रहरी बलका दुवै महानिरीक्षक (आईजीपी) समेत सहभागी थिए ।

वर्षायाम सुरु भएसँगै हुनसक्ने सम्भावित विपद्को जोखिमलाई मध्यनजर गर्दै मन्त्री गुरुङले उद्धारका लागि आवश्यक उपकरण, जनशक्ति र पूर्वतयारीको अवस्थाबारे जानकारी लिएका हुन् । नागरिकको जिउधनको सुरक्षाका लागि उपलब्ध स्रोत-साधनलाई तयारी अवस्थामा राख्न उनले सुरक्षा निकायका प्रमुखलाई निर्देशन समेत दिएका छन् ।

विपद्का बेला तत्काल परिचालन हुनुपर्ने उद्धार टोलीको मनोबल र भौतिक पूर्वाधारको अवस्था बुझ्न आफू फिल्डमा उत्रिएको उनले बताए । यसअघि मन्त्रालयमा आगामी वर्षको बजेट तथा नीतिगत कार्यक्रमबारे गृह प्रशासनका उच्च अधिकारीहरूसँग दिनभर मन्त्री गुरुङले छलफल गरेका थिए ।