काठमाडौं– प्रतिनिधिसभा सदस्य निर्वाचन २०८२ अन्तर्गत हालसम्मको नतिजामा राष्ट्रिय स्वतन्त्र पार्टी (रास्वपा) स्पष्ट रूपमा अगाडि देखिएको छ।

शनिबारसम्म सार्वजनिक भएको पछिल्लो तथ्यांकअनुसार रास्वपाले ३६ सिटमा जित हासिल गरिसकेको छ । अहिले ऊ ८३ निर्वाचन क्षेत्रमा अग्रतासहित एकछत्र नतिजातर्फ देखिएको छ।

यस्तै नेपाली कांग्रेसले ६ सिट जित्दा १० क्षेत्रमा अग्रता बनाइरहेको छ। नेकपा (एमाले) ले २ सिट जितेको छ भने ९ क्षेत्रमा अघि रहेको छ।

तर नेपाली कांग्रेसका सभापति गगनकुमार थापा सर्लाहीमा पराजित हुने खतरा बढेको छ। उता महामन्त्री प्रदीप पौडेल काठमाडौं ६ मा पराजित भइसकेका छन् ।

उता एमालेका अध्यक्ष केपी शर्मा ओलीसहित अधिकांश पदाधिकारीको पराजय भइसकेको छ। ओली पराजित भएको औपचारिक परिणाम मात्रै आउन बाँकी छ ।

त्यसैगरी नेपाली कम्युनिष्ट पार्टीले २ सिट जित्दै ७ क्षेत्रमा अग्रता कायम गरेको छ। श्रम संस्कृति पार्टीले हालसम्म कुनै सिट जित्न सकेको छैन तर ४ क्षेत्रमा अगाडि रहेको छ।

राष्ट्रिय प्रजातन्त्र पार्टी (राप्रपा) १ क्षेत्रमा अग्रस्थानमा रहेको छ । जनता समाजवादी पार्टी, नेपाल र नेपाल कम्युनिस्ट पार्टी (माओवादी) ले हालसम्म कुनै सिटमा जित र अग्रता हासिल गर्न सकेका छैनन्।