काठमाडौँ- भक्तपुर क्षेत्र नं. २ बाट प्रतिनिधि सभा निर्वाचनमा पराजित भएका नेपाल कम्युनिष्ट पार्टी (एमाले) का सचिव महेश बस्नेतले राष्ट्रिय स्वतन्त्र पार्टीका उम्मेदवार राजीव खत्रीलाई बधाई दिएका छन्।

बस्नेतले सामाजिक सञ्जालमार्फत प्रतिक्रिया दिँदै यसपटकको निर्वाचन परिणाम आफ्नो पक्षमा आउन नसकेको उल्लेख गरेका छन् ।

उनलेे लोकतन्त्रमा जनताको निर्णय नै सर्वोपरि हुने भएकाले त्यसलाई सम्मानपूर्वक स्वीकार गरेको बताएका छन्।

उनले भक्तपुर–२ बाट विजयी भएका राष्ट्रिय स्वतन्त्र पार्टीका उम्मेदवार राजीव खत्रीलाई हार्दिक बधाई तथा सफल कार्यकालको शुभकामना व्यक्त गरेका छन्।

यसका साथै सूर्य चिन्हमा मतदान गरी आफूमाथि विश्वास व्यक्त गर्ने मतदाता तथा चुनावी अभियानमा सक्रिय रूपमा खटिने पार्टीका नेता–कार्यकर्ता प्रति कृतज्ञता व्यक्त गरेका छन्।

बस्नेतले राजनीतिमा हार–जित स्वाभाविक प्रक्रिया भएको उल्लेख गर्दै अब आफ्नो भूमिका रचनात्मक प्रतिपक्षको रहने बताएका छन्।

जनताको शिक्षा, स्वास्थ्य, रोजगारी, भ्रष्टाचारमुक्त सुशासन र समृद्ध समाज निर्माणका लागि सदन बाहिरबाट पनि निरन्तर आवाज उठाइरहने उनको भनाइ छ।

उनले जनताको विश्वास, माया र साथ नै आफ्नो सबैभन्दा ठूलो शक्ति भएको उल्लेख गर्दै आगामी दिनमा पनि भक्तपुरको समृद्धि र जनताको सेवामा समर्पित रहने प्रतिबद्धता व्यक्त गरेका छन्।