काठमाडौँ – नेकपा (एमाले)का महासचिव शंकर पोखरेलले आम निर्वाचनमा जितको लहर चलाएको राष्ट्रिय स्वतन्त्र पार्टी (रास्वपा)को सिंगो टिमलाई शुभकामना दिएका छन् । उनले जिन्दगीमा हार जित भइरहने भन्दै विजयी रास्वपाका उम्मेदवारलाई शुभकामना दिएका हुन् ।
पोखरेलले रास्वपाका प्रस्ताविक प्रधानमन्त्री उम्मेदवार बालेन शाहसहित विजयी सबैलाई शुभकामना दिएका हुन् ।

‘आम निर्वाचन २०८२ को जनादेश राष्ट्रिय स्वतन्त्र पार्टी को पक्षमा आएको छ। जनताले “नयाँबाट केही हुन्छ कि” भन्ने विश्वासका साथ अभिमत दिएका छन्। जनविश्वास अनुरूप अघि बढ्न पार्टीका प्रस्तावित प्रधानमन्त्री उम्मेदवार बालेन शाह सहित विजयी हुनुहुने सम्पूर्ण प्रतिनिधिहरूलाई कार्य सफलताको शुभकामना’, उनले लेखेका छन् ।

उनले आफ्नो निर्वाचन क्षेत्रमा सहयोग गर्ने सबै कार्यकर्ता र शुभेच्छुकलाई धन्यवाद दिँदै परिवर्तनको लहरलाई स्वीकार गर्न अनुरोध गरेका छन् । ‘यस पटकको निर्वाचनमा म उम्मेदवार भएको निर्वाचन क्षेत्रमा पार्टीका नेता तथा कार्यकर्ताहरूले निकै मेहनत गर्नुभयो। शुभेच्छुक र आफन्तजनहरूले पनि उत्तिकै साथ र सहयोग दिनुभयो। तर ‘परिवर्तन’ को लहरका सामु हाम्रो प्रयास सफल हुन सकेन। अभियानमा जुट्नुहुने सबैलाई हृदयदेखि नै धेरै–धेरै धन्यवाद’, उनले लेखेका छन् ।
उनले दाङ २ बाट निर्वाचित रास्वपाका विभिन आचार्यलाई बधाईसमेत दिएका छन् ।
‘म उमेद्वार भएको प्रतिनिधि सभा–२ निर्वाचन क्षेत्रबाट रास्वपाका विपिन आचार्य निर्वाचित हुनुभएकोमा हार्दिक बधाई तथा सफल कार्यकालको शुभकामना’, उनले थप लेखेका छन्, ‘अन्त्यमा,“जिन्दगी हो—हार जित भइरहन्छ, बाधा पन्छाउँदै नदी बगिरहन्छ।” भन्ने गितको भावझैँ लोकतान्त्रिक प्रक्रियामा हार–जित स्वाभाविक हो। निराश नभई सकारात्मक सोचका साथ आफ्नो कर्तव्यमा निरन्तर लागिरहन सबैमा हार्दिक अनुरोध गर्दछु।’