काठमाडौं- नेपाली कांग्रेस विशेष महाधिवेशन पक्षधरले पुस २७ र २८ गते विशेष महाधिवेशन आयोजना गर्न कार्यतालिका सार्वजनिक गरेको छ ।

बुधबार काठमाडौंमा पत्रकार सम्मेलन गर्दै उनीहरुले पौष २८ भित्र १५ औँ महाधिवेशन सम्पन्न हुन नसकेको भन्दै विधानको व्यवस्थाअनुसार पुस २७ र २८ गते काठमाडौंमा विशेष महाधिवेशन गर्न लागिएको जनाएका हुन् ।

पार्टी विधानले विधानसम्मत् प्रक्रिया पूरा गरी माग भएको विषेश महाधिवेशन नहुने परिकल्पना नगरेको पनि उनीहरूले बताएका छन् ।

पार्टीको विधान बमोजिम कारण देखाएर माग गरेको विशेष महाधिवशेनलाई असान्दर्भिक वा औचित्यहीन भन्ने अधिकार कसैलाई नरहेको उनीहरूले जनाएका छन् ।

पत्रकार सम्मेलनमा नेता सुवास पोखरेलले विशेष महाधिवेशन सम्पन्न गर्न बिभिन्न तयारी व्यवस्थापनसम्बन्धी १८ वटा उपसमिति गठन गरिएको जानकारी दिए ।

उनले विशेष महाधिवेशनको अघि केन्द्रले आफ्नो दायित्व बुझ्ने र आयोजनाको स्वामित्व लिने विश्वास व्यक्त गरेका छन् ।

उनीहरूले सम्पूर्ण महाधिवेशन प्रतिनिधिको सक्रिय उपस्थिति र सहभागिताका लागि आग्रहसमेत गरेका छन् ।

पार्टीको एकतालाई थप सुदृढ पार्न विशेष महाधिवेशन कोसेढंगा सावित हुने विशेष महाधिवेशन पक्षधरले जनाएका छन् ।