सुनसरी- श्रम संस्कृति पार्टीका केन्द्रीय अध्यक्ष एवम् धरान उपमहानगरपालिकाका प्रमुख हर्कराज राई (साम्पाङ) ले सुनसरी क्षेत्र नम्बर १ बाट फागुन २१ गतेको प्रतिनिधिसभा चुनाव लड्ने भएका छन् ।

साम्पाङले प्रतिनिधिसभा निर्वाचनमा सुनसरी क्षेत्र नम्बर १ बाट चुनाव लड्ने घोषणा गरेका हुन् । सामाजिक सञ्जाल फेसबुकमा साम्पाङले भनेका छन्- ‘म सुनसरी क्षेत्र नम्बर १ बाटै प्रतिनिधिसभाको चुनाव लड्नेछु ! जय माटो, जय देश ।’

सुनसरी क्षेत्र नम्बर १ अन्तर्गत धरान उपमहानगरपालिकाका २० वटै वडा समेटिएका छन् । त्यसैगरी बराहक्षेत्रको नगरापलकािका ५ र रामधुनी नगरपालिकाका २ वटा वडा समेटिएका छन् ।

२०७९ को संसदीय निर्वाचनमा सुनसरी क्षेत्र नम्बर १ बाट एमालेको समर्थनमा जनता समाजवादी पार्टी नेपालका अशोककुमार राई विजयी भएका थिए ।

साम्पाङ पनि २०७९ को स्थानीय तह निर्वाचनमा लौरो चुनाव चिह्न लिएर स्वतन्त्र रुपमा मेयरमा विजयी भएका थिए । तर उनी करिब मेयरको आधा कार्यकाल बाँकी रहँदै संसदीय निर्वाचनमा होमिन लागेका हुन् ।

साम्पाङल श्रम संस्कृति पार्टी खोलेर कोशी प्रदेशका सबै जिल्लादेखि काठमाडौं र लुम्बिनी प्रदेशसम्म अभियान लिएर पुगिसकेका छन् । कोशी पहाडमा साम्पाङको पार्टीलाई बलियो समर्थन देखिएको छ।