काठमाडौँ – निर्वाचन (म्यादी) प्रहरी, नेपाल प्रहरी र सशस्त्र प्रहरी बल, नेपालको पोसाक खरिदसम्बन्धी अध्ययन उपसमितिले १९ बुँदे कार्यविधि र कार्यअविधि सर्वसम्मतिले पारित गरेको छ।

बुधबार सिंहदरबारमा बसेको उपसमितिको पहिलो बैठकले उक्त कार्यविधि सर्वसम्मत रूपमा पारित गर्दै सबै सदस्यले हस्ताक्षर गरेका छन्।

समितिका सभापति एवं राष्ट्रिय स्वतन्त्र पार्टीका सांसद मनिष झाले सीमित समयभित्र प्राप्त कागजातको अध्ययनलाई प्रभावकारी रूपमा अघि बढाउनु मुख्य चुनौती रहेको बताएका छन्।

उपसमितिको बैठक बुधबार पहिलोपटक बसेको र अर्को बैठक दसैँपछि मात्रै बस्ने उनले जानकारी दिए। विभिन्न निकायबाट प्राप्त कागजात तथा प्रमाणको अध्ययन गर्ने प्रक्रियासमेत बैठकले तय गरेको छ।

प्राप्त दस्ताबेजको गोपनीयता कायम राख्न लेखा समितिकै सभाहलमा आवश्यक निगरानीका बीच अध्ययन गरिने स्पष्ट पारिएको छ। कुनै पनि कागजात बाहिर लैजान वा सार्वजनिक गर्न नपाइने व्यवस्था गरिएको छ।

सभापति झाले भने, ‘बैठकले १९ बुँदे कार्यविधि र कार्यअविधि सर्वसम्मतिले पारित गरेको छ। आगामी बैठक दसैँपछि बस्ने निर्णय भएको छ। उपसमितिको कार्यअवधि दुई महिना अर्थात् मङ्सिर २० गतेसम्म रहेको छ। प्राप्त दस्ताबेजहरूको गोपनीयता कायम राख्दै लेखा समितिकै सभाहलमा निगरानीका बीच अध्ययन गरिनेछ। कुनै पनि कागजात बाहिर लैजान वा सार्वजनिक गर्न पाइने छैन। अब मुख्य चुनौती चाडपर्वका कारण हुने लामो बिदा र सदस्यको जिल्ला भ्रमण हो।’

उपसमितिलाई प्राप्त कागजात तथा तथ्यको अध्ययन गरी प्रतिवेदन बुझाउन आगामी मङ्सिर २० गतेसम्मको दुई महिनाको समयसीमा ताेकिएको छ।