काठमाडौँ- राष्ट्रियसभाको भोटेकोशी एवं कालीगण्डकी करिडोर विपद्सम्बन्धी अध्ययन तथा अनुगमन संसदीय विशेष समितिको सभापतिमा नेपाली कांग्रेसका सांसद कृष्णप्रसाद पौडेलको मात्र उम्मेदवारी परेको छ।

राष्ट्रियसभा नियमावली, २०७५ को नियम १६७ को उपनियम (१) बमोजिम सभापति पदका लागि बुधबार अपराह्न ४ बजेसम्म उम्मेदवारी दर्ताको समय तोकिएको थियो। निर्धारित समयभित्र पौडेलको मात्रै उम्मेदवारी परेको राष्ट्रियसभाका सचिव तुलबहादुर कँडेलद्वारा जारी सूचनामा उल्लेख छ।

पौडेलको उम्मेदवारीको प्रस्तावकमा सांसद श्रीकृष्णप्रसाद अधिकारी तथा समर्थकमा सांसद सम्झना देवकोटा र तुलप्रसाद विश्वकर्मा रहेका छन्।

स्याङ्जाको भीरकोट–२ निवासी ६६ वर्षीय पौडेलको मात्र उम्मेदवारी परेकाले उनी समितिको सभापतिमा निर्विरोध निर्वाचित हुनेछन्। सभापति चयनको औपचारिक प्रक्रिया समितिको बिहीबार बस्ने बैठकबाट पूरा गरिनेछ।