काठमाडौं– खसीको मासु भन्दै बाख्रीको मासु बेचेको आरोपमा काठमाडौंको रातोपुलबाट तीनजना पक्राउ परेका छन् ।

काठमाडौं महानगरपालिका–८ रातोपुलस्थित सफिक मासु पसलमा खसीको मासु भन्दै बाख्रीको मासु बेचिरहेको सूचनाका आधारमा प्रहरी वृत्त गौशालाबाट खटिएको टोलीले पसलमा छापा मारेको थियो ।

चेकजाँचका क्रममा पसलमा बाख्री काटेर मासु बिक्री वितरण गरिरहेको पाइएको थियो । थप एउटा जिउँदो बाख्री काट्न तयारी अवस्थामा राखिएको अवस्थामा भेटिएको प्रहरीले जनाएको छ । उनीहरूले बाख्रीको अंगमा खसीको भाग टेपले टाँसेर मासु बेचिरहेको भेटिरहेको थियो ।

प्रहरीले पसल सञ्चालक भारतको बिहार, सीतामढी घर भई हाल रातोपुल बस्ने २५ वर्षीय महमद इम्रान मन्सुरी, नुवाकोट घर भएका सिफल बस्ने १८ वर्षीय अरुण कार्की र हेटौंडा घर भई हाल रातोपुल बस्ने २१ वर्षीय सुजन रसाईलीलाई शनिबार पक्राउ गरेको हो ।

उनीहरूमाथि कालोबजारी गर्न नहुने कसुरमा जिल्ला प्रशासन कार्यालय काठमाडौंको अनुमति लिएर चार दिनको म्याद थप गरी अनुसन्धान भइरहेको जिल्ला प्रहरी परिसरले जनाएको छ ।