काठमाडौं– त्रिशूली–३ ‘बी’ जलविद्युत् आयोजना स्थलमा उद्धार कार्य प्रभावकारी रुपमा अघि बढाउन माग गर्दै पीडित परिवारले काठमाडौंमा प्रदर्शन गरेका छन् ।

चाँडोभन्दा चाँडो अपर त्रिशूली–३ ‘बी’ जलविद्युत् आयोजना स्थलमा उद्धार कार्य अघि बढाउन माग गर्दै बेपत्ता भएका व्यक्तिका परिवारले काठमाडौंको माइतीघरमा प्रदर्शन गरेका हुन् ।

प्रदर्शनमा आएकी एक महिलाले भनिन्, ‘सरकारले बाढी आएको पहिलो दिनमा विदेशी सहयोग नै लिएन, लिएको भए हाम्रा मान्छे भेटिन्थ्ये । सरकारले उद्धार भइरहेको छ त भन्छ, तर नतिजा छैन । मेरो दाइ लगायत धेरै जना बेपत्ता हुनुहुन्छ ।’

उनले भौगोलिक हिसाबले त्रिशूली थ्री डि गाह्रो भएपनि अरु ठाउँ पनि सजिलो नभएको बताइन् । ‘सरकारले हँसिया र कोदालो बोकेर मान्छे पठाउँछ, खेत खन्न पठाएको हो र ?’ उनले प्रश्न गरिन् ।

प्रदर्शनमै आएकी अर्की महिलाले चाहिँ गृहमन्त्री आफैँ कुदेर नहुने भन्दै बरु आफूहरु नै सिलिन्डर बोक्न तयार रहेको उल्लेख गरिन् । ‘गृहमन्त्रीज्यू तपाईं काम गर्नुहोस् ।’ ती महिलाले भनिन् ।

विदेशीले सहयोग गर्छौँ भन्दा सरकार ‘सुपरहिरो’ भएर बसेको उनको आरोप छ । ‘त्यति ठूलो पोस्टमा बसेर सिटन्टबाजी मात्रै गरेर देश चलाउन सकिँदैन,’ उनले भनिन्, ‘केही गर्न सक्नु हुन्न भने हात उठाउनु, हामी जान्छौँ, आफैँ गर्छौँ ।’