काठमाडौं– पूर्वप्रधानमन्त्री डा बाबुराम भट्टराईले पुराना पुस्ताको ज्ञान र अनुभव नयाँ पुस्तामा हस्तान्तरण गर्दै मुलुकको विकासमा एकीकृत हुनुपर्ने बताएका छन् । 

पूर्वराज्यमन्त्री एवं उद्योगपति हरि प्रसाद पाण्डेद्वारा लिखित पुस्तकको सोमबार काठमाडौंमा विमोचन गर्दै भट्टराईले नयाँ पुस्तासँग आधुनिक ज्ञान, प्रविधि, सिप र नयाँ अनुभव भएकाले पुराना पुस्ताको ज्ञान र अनुभव नयाँ पुस्तामा हस्तान्तरण गर्दै मुलुकको विकासमा एकीकृत हुनुपर्ने बताएका हुन् ।

उनले राजनीतिक अधिकार प्राप्त भइसकेपछि अबको लक्ष्य सम्पूर्ण जनताको सहभागितामा मानवीय र प्राकृतिक साधन र स्रोतको अधिकतम प्रयोग गरी देशको विकास गर्नु नै भएको उल्लेख गरे ।

नेपाल कृषिप्रधान अर्थतन्त्रबाट औद्योगिक र सेवा प्रदायक अर्थतन्त्रमा जोडिन खोज्न लागेको भन्दै भट्टराईले यसलाई सफल बनाउन केही दशकसम्म राजनीतिक स्थिरता, सुशासन र स्पष्ट योजना बनाएर अघि बढ्नुपर्नेमा जोड दिए।

उनले राजनीतिक अधिकारको लडाइँ र विद्रोहका लागि बनेका पुराना विचार र सङ्गठनहरू आजको विकास, समृद्धि र सुशासनको युगमा जस्ताको तस्तै काम लाग्न नसक्ने भएकाले नयाँ विचार र सोचसहितको नयाँ पुस्तालाई अगाडि बढाउन आवश्यक रहेको तर्क गरे । 

उनले नयाँ दल रास्वपाले आफ्नो बाचा पत्रमा उठाएका देश विकासका कुराहरूलाई राष्ट्रिय नीति बनाउनुपर्ने र यसमा कांग्रेस, एमाले, माओवादी लगायतका सबै दलले सहयोग गर्नुपर्ने बिचार व्यक्त गरे  ।