काठमाडौं- बंगलादेशमा रहेका अल्पसंख्यक इसाई समुदायमाथि पछिल्लो समय साम्प्रदायिक आक्रमणका घटनाहरू तीव्र रूपमा बढ्न थालेका छन् । विशेष गरी इस्लामवादी दल जमात-ए-इस्लामीको बलियो प्रभाव रहेका क्षेत्रहरूमा इसाईहरुलाई बढी निसाना बनाइएको छ ।

सन् २०२४ मा तत्कालीन प्रधानमन्त्री शेख हसिनाको १५ वर्षे शासनकालको अन्त्य भएपछि गत फेब्रुअरीमा बंगलादेशमा पहिलो पटक आम निर्वाचन सम्पन्न भएको थियो । हसिनाको बहिर्गमनपछि देशमा क्रिस्चियन र हिन्दु दुवै समुदायमाथि आक्रमणका घटनाहरू बढेको छ ।

यसमा पनि विशेष गरी इस्लाम धर्म परिवर्तन गरेर इसाई बनेकाहरू बढी जोखिममा परेका छन् । हालै सम्पन्न निर्वाचनमा बंगलादेश नेशनालिस्ट पार्टी (बीएनपी) विजयी भएको छ भने उनको मुख्य प्रतिद्वन्द्वीको रूपमा जमात-ए-इस्लामी लगायतका इस्लामवादी दलहरूको गठबन्धन रहेको थियो ।

चुनावमा पराजित भए पनि यो गठबन्धनले झन्डै एक तिहाइ मत प्राप्त गर्न सफल भएको थियो । अल्पसंख्यक इसाईहरुको हकहितमा काम गर्ने संस्था ओपन डोर्स यूके एन्ड आयरल्यान्डका अनुसार निर्वाचनपछि अल्पसंख्यकहरू विरुद्धको हिंसा झनै चर्किएको छ ।

निर्वाचन सकिएयता मात्रै ५० भन्दा बढी यस्ता हिंसात्मक घटनाहरू दर्ता भइसकेका छन् । हालै राजधानी ढाकाको सेन्ट युजिन डी माजेनोडमा एक क्याथोलिक पादरीमाथि हातपात गर्दै उनको राहदानी र करिब एक हजार पाउन्ड बराबरको रकम लुटिएको थियो ।

शारीरिक हिंसाका साथै इसाई समुदायले मानसिक दबाब र असहष्णुताको पनि सामना गर्नु परिरहेको छ । हालै एक इस्लामवादी प्राथमिक विद्यालयका शिक्षकले स्थानीय इसाईहरुलाई धर्म परिवर्तन गर्न दबाब दिएका थिए ।

यस्ता घटनाहरू बढेपछि गत मार्च महिनामा हिन्दु र क्रिस्चियन समुदायका नेताहरूले ढाकामा संयुक्त रूपमा विरोध प्रदर्शन गरेका थिए । उनीहरूले वर्तमान बीएनपी सरकारसँग अल्पसंख्यक समुदायको जिउधनको सुरक्षा सुनिश्चित गर्न जोडदार माग गरेका छन् ।