काठमाडौं- भारत भ्रमणमा रहेका परराष्ट्रमन्त्री शिशिर खनालले नयाँ दिल्लीमा भारतीय समकक्षी एस जयशङ्करसँग भेटवार्ता गरेका छन् ।

भेटवार्ताका क्रममा मन्त्री खनालले भारत नेपालको सबैभन्दा महत्त्वपूर्ण साझेदार भएको भन्दै भारतसँगको सम्बन्धलाई उच्च प्राथमिकतामा राखेको उल्लेख गरेका छन् । मन्त्री खनालले दुई देशबीचको सहकार्यलाई थप ठोस र अर्थपूर्ण रूपमा अगाडि बढाउन नेपाल पूर्ण रूपमा तयार रहेको बताए ।

भेटवार्ताका क्रममा भारतीय विदेशमन्त्री जयशङ्करले भारत र नेपालबीचको सम्बन्ध ‘बलियो जग’ मा आधारित अत्यन्त ‘विशेष’ रहेको बताएका छन् ।

पश्चिम एसियामा जारी भूराजनीतिक तनाव र सङ्कट देखिएका बेला पनि भारतले नेपालका लागि इन्धनको आपूर्तिलाई निरन्तरता दिँदै त्यसको सुनिश्चितता गरेको स्मरण गराउँदै उनले भारत सधैँ नेपालको भरपर्दो साझेदार रहने प्रतिबद्धता व्यक्त गरेका छन् ।