काठमाडौं– नेपाल रन फाइव के च्यालेन्ज वैशाख २६ गते आयोजना हुने भएको छ ।

एथलेटिक्स परिवार, नेपालले बुधबार काठमाडौंमा पत्रकार सम्मेलनको आयोजना गर्दै चाँगुनारायण नगरपालिकाको सहयोगमा वैशाख २६ गते भक्तपुरको चाँगुनारायणमा नेपाल रन फाइव के च्यालेन्ज गर्न लागिएको जनाएको हो ।

खुला महिला, पुरुष, ४५ वर्ष माथि पुरुष भेट्रान तर्फ ५ किलोमिटर, १८ वर्ष भन्दा मुनीका युवा, महिला, पुरुष र ३५ वर्ष माथिका भेट्रान महिला तर्फ ३ किलोमिटर दौडमा प्रतिस्पर्धा हुने प्रतियोगितामा करिब २५० भन्दा बढी खेलाडीहरूको भाग लिने एथलेटिक्स परिवार, नेपालका अध्यक्ष राजन खत्रीले जानकारी दिए ।

दौड प्रतियोगिताको कुल बजेट ७ लाख ६६ हजार रुपैयाँ रहेको छ । दौड चाँगुनारायण नगरपालिका भवन परिसरबाट सुरु भई विभिन्न स्थान हुँदै पुनः नगरपालिका भवनमा पुगेर समापन हुने आयोजकले जनाएको छ ।