काठमाडौं– विशेष अदालतले सम्पत्ति शुद्धीकरण (मनी लाउन्डरिङ) सम्बन्धी मुद्दामा आरोपित दीपक भट्ट र सुलभ अग्रवाललाई थप हिरासतमा राखी अनुसन्धान गर्न अनुमति दिएको छ।

न्यायाधीशहरू हेमन्त रावल, डिल्लीरत्न श्रेष्ठ र विदुर कोइरालाको इजलासले सम्पत्ति शुद्धीकरण (मनी लाउन्डरिङ) निवारण ऐन, २०६४ को दफा १७ अनुसार उनीहरूको म्याद थप गर्ने आदेश दिएको हो।

अदालतको आदेशअनुसार भट्टको हकमा पाँचौँ पटक र सुलभ अग्रवालको हकमा छैटौँ पटक म्याद थप गरिएको छ।

दुवैलाई बुधबारदेखि लागू हुने गरी १२ दिनका लागि थप अनुसन्धान हिरासतमा राखिने भएको हो।

सम्पत्ति शुद्धीकरण अनुसन्धान विभागको पत्रका आधारमा उनीहरूमाथि अनुसन्धान भइरहेको छ। अदालतले सम्बन्धित सरकारी वकिल कार्यालयमार्फत अभियोजन प्रक्रिया बाँकी रहेको उल्लेख गरेको छ।

अदालतले संयुक्त अनुसन्धान टोलीबाट भइरहेको अनुसन्धान तथा हालैको कानुनी संशोधनलाई समेत ध्यानमा राख्दै म्याद थपको आदेश दिएको हो।