काठमाडौं- सर्वदलीय बैठकले नयाँ प्रतिनिधिसभा नियमावली बनाउने निर्णय गरेको छ ।

सिंहदरबारमा सोमबार बसेको बैठकले प्रतिनिधिसभा नियमावली २०७९ संशोधन गरेर नयाँ बनाउने निर्णय गरेको हो ।

यसका लागि नियमावली मस्यौदा समिति गठन गर्ने निर्णय भएको नेकपा एमालेका सांसद गुरू बरालले जानकारी दिए ।

त्यस्तै बैठकले संसद्को काम-कारबाहीलाई डिजिटल बनाउँदै लैजाने निर्णय पनि गरेको छ।

तत्काललाई कागज र डिजिटल दुवैको प्रयोग गर्ने निर्णय भएको छ। सबै दलको प्रभावकारी प्रतिनिधित्व रहने गरि २१ सदस्यीय कार्यव्यवस्था परामर्श समिति बनाइने बरालले बताए ।

उनले संविधानको प्रयोगमा देखिएको चुनौतीहरूबारे एमालेले सदनमार्फत् आवाज उठाउने बताए ।

कानुनको परिपालनाको विषयमा कुनै विवाद नगर्ने भन्दै उनले विधिको शासनमाथि प्रश्न उठे प्रतिपक्षीको हैसियतले आवाज बुलन्द गर्ने धारणा राखे ।

त्यस्तै, एमाले सांसद बरालले सरकार संविधान र कानूनभन्दा बाहिर गएर सदनबाट प्रतिवाद गर्नेसमेत उल्लेख गरे ।